ប្រែសម្រួល៖ ស-សម្បត្តិ

លោក Donald Trump មិនមែនជាប្រធានាធិបតីតែម្នាក់គត់ដែលដឹងថាកិច្ចព្រមព្រៀងមិនល្អនៅពេលគាត់ឃើញវានោះទេ។

ការបដិសេធរបស់លោក Volodymyr Zelensky ក្នុងការចុះហត្ថលេខាលើការផ្ដល់រ៉ែកម្រស្ទើរតែពាក់កណ្ដាលនៃប្រទេសរបស់គាត់ ដោយទទួលបានការធានាតិចតួចសម្រាប់អនាគត គឺជាហេតុផលមួយក្នុងចំណោមហេតុផលជាច្រើនដែលធ្វើឱ្យលោក Trump ខឹងយ៉ាងខ្លាំងចំពោះដៃគូរបស់គាត់នៅក្នុងទីក្រុងគីវ។

ប្រធានាធិបតីអ៊ុយក្រែនបានបញ្ជាក់យ៉ាងច្បាស់ថា ការប្រើប្រាស់ធនធានភូមិសាស្ត្រ និងថាមពលដ៏មានតម្លៃរបស់ប្រទេសគាត់នឹងក្លាយជាមធ្យោបាយមួយដើម្បីកសាងសេដ្ឋកិច្ច និងទីក្រុងឡើងវិញបន្ទាប់ពីសង្គ្រាមបញ្ចប់។ ប៉ុន្តែសំណើដែលដាក់ជូនដោយរដ្ឋមន្ត្រីរតនាគារលោក Scott Bessent ទោះបីជាត្រូវបានសរសើរដោយមន្ត្រីអាមេរិកថាជាជណ្ដើរឆ្ពោះទៅរកវិបុលភាពសម្រាប់អ៊ុយក្រែនក៏ដោយ ក៏មិនមែនជា “កិច្ចព្រមព្រៀង” ពិតប្រាកដនោះដែរ។

ទោះយ៉ាងណាក៏ដោយ វាផ្ដល់នូវការយល់ដឹងអំពីទស្សនៈរបស់លោក Trump លើគោលនយោបាយការបរទេស និងការយល់ឃើញរបស់គាត់អំពីសង្គ្រាម បន្ទាប់ពីគាត់បានប្ដូរជំហរ យ៉ាងហោចណាស់ក្នុងការនិយាយ ពីការគាំទ្ររបស់រដ្ឋបាល Biden ចំពោះភាគីដែលត្រូវបានឈ្លានពាន ហើយបានគាំទ្រភាគីឈ្លានពានវិញ។

ដូចគ្នានឹងផែនការរបស់គាត់ក្នុងការផ្លាស់ប្តូរទីលំនៅជនជាតិប៉ាឡេស្ទីនទាំងអស់ចេញពីហ្គាហ្សា ដើម្បីឱ្យសហរដ្ឋអាមេរិកអាចសាងសង់រមណីយដ្ឋានឆ្នេរសមុទ្រ គោលបំណងរបស់ប្រធានាធិបតីហាក់ដូចជាផ្អែកលើការទាញយកផលចំណេញជាប្រាក់ដ៏ល្អបំផុតសម្រាប់សហរដ្ឋអាមេរិក ជាជាងការដោះស្រាយជម្លោះដ៏ឃោរឃៅមួយដែលគំរាមកំហែងដល់ពិភពលោកប្រកបដោយសមធម៌។ លោក Trump កំពុងឆ្លុះបញ្ចាំងពីការសង្ស័យក្នុងចំណោមមូលដ្ឋានគាំទ្ររបស់គាត់ចំពោះជំនួយយោធា និងហិរញ្ញវត្ថុរាប់សិបប៊ីលានដុល្លារដែលរដ្ឋបាល Biden បានផ្ញើទៅអ៊ុយក្រែន បន្ទាប់ពីប្រទេសនេះត្រូវបានកងទ័ពរបស់ប្រធានាធិបតីរុស្ស៊ី Vladimir Putin ឈ្លានពានដោយខុសច្បាប់កាលពីបីឆ្នាំមុន។ ប៉ុន្តែវិធីសាស្ត្រប្រតិបត្តិការរបស់លោក Trump តំណាងឱ្យការបំបែកគុណតម្លៃគោលនយោបាយការបរទេសដែលសហរដ្ឋអាមេរិកបានអនុវត្តអស់រយៈពេលជាច្រើនទសវត្សរ៍ រួមទាំងគោលការណ៍ដែលថាប្រទេសខ្លាំងមិនគួរឈ្លានពានប្រទេសតូចៗ ដែលវ៉ាស៊ីនតោនបានកត់ត្រាក្នុងធម្មនុញ្ញអង្គការសហប្រជាជាតិ។

សម្ពាធរបស់គាត់លើអ៊ុយក្រែន ដែលជាជនរងគ្រោះក្នុងជម្លោះ ក៏ជាការប្រឹងប្រែងតឹងរឹងដើម្បីឆ្លៀតឱកាសពីប្រទេសមួយក្នុងពេលវេលាដ៏ងងឹតបំផុតរបស់វាផងដែរ។ ខណៈពេលដែលលោក Putin បានកាត់យកដែនដីដ៏ធំរបស់ប្រទេសនេះ លោក Trump ស្វែងរកចំណែកដ៏ធំនៃធនធានរ៉ែរបស់វាក្នុងតម្លៃទាប។ “កិច្ចព្រមព្រៀង” នេះមើលទៅដូចជាទម្រង់នៃការគំរាមកំហែងដែលលោក Trump ធ្លាប់បានសាកល្បងលើលោក Zelensky ពីមុនមក — ដោយប្រើជំនួយយោធាជាការលើកទឹកចិត្តឱ្យគាត់ប្រកាសការស៊ើបអង្កេតលើលោក Joe Biden ដែលនាំឱ្យមានការដាក់ទោសប្រធានាធិបតី (impeachment) លើកទីមួយរបស់លោក Trump។

ទោះយ៉ាងណា សេតវិមានបាននិយាយថា លោក Zelensky មិនមានជម្រើសក្រៅពីចុះហត្ថលេខាលើកិច្ចព្រមព្រៀងដើម្បីសងអ្នកបង់ពន្ធអាមេរិកសម្រាប់ខ្សែជីវិតរបស់គីវឡើយ — ទោះបីជាវាមិនមានការធានាថាវ៉ាស៊ីនតោននឹងបន្តផ្តល់ជំនួយនាពេលអនាគតក៏ដោយ។

“ប្រធានាធិបតី Trump ពិតជាមានការខកចិត្តយ៉ាងខ្លាំងជាមួយប្រធានាធិបតី Zelensky នាពេលនេះ” នេះជាប្រសាសន៍របស់លោក Mike Waltz ទីប្រឹក្សាសន្តិសុខជាតិសេតវិមាន កាលពីថ្ងៃព្រហស្បតិ៍។ “ការពិតដែលថាគាត់មិនបានចូលរួមក្នុងការចរចា ហើយគាត់មិនព្រមទទួលយកឱកាសដែលយើងបានផ្តល់ជូន — ខ្ញុំគិតថាគាត់នឹងឈានដល់ចំណុចនោះក្នុងពេលឆាប់ៗនេះ ហើយខ្ញុំសង្ឃឹមថាវានឹងកើតឡើងយ៉ាងឆាប់រហ័ស។”

• ការផ្លាស់ប្តូរជំហរដ៏គួរឱ្យភ្ញាក់ផ្អើលរបស់សហរដ្ឋអាមេរិក

ជម្លោះលើកិច្ចព្រមព្រៀងរ៉ែកម្រនេះកើតឡើងក្នុងពេលដែលទំនាក់ទំនងរវាងសហរដ្ឋអាមេរិក និងលោក Zelensky កំពុងធ្លាក់ចុះយ៉ាងធ្ងន់ធ្ងរ ដែលបណ្តាលមកពីការដែលលោក Trump ទទួលយកការឃោសនារបស់រុស្ស៊ីអំពីសង្គ្រាម រួមទាំងការចោទប្រកាន់មិនពិតថា មេដឹកនាំអ៊ុយក្រែនជាអ្នកចាប់ផ្តើមជម្លោះ និងថាគាត់ជាផ្តាច់ការ។ ផ្តាច់ការក្នុងស្ថានការណ៍នេះគឺលោក Putin ដែលបានគ្រប់គ្រងប្រទេសរុស្ស៊ីអស់រយៈពេល ២៥ ឆ្នាំ ដាក់គូប្រជែងរបស់គាត់ក្នុងគុក បំបិទសេរីភាពសារព័ត៌មាន និងរៀបចំការបោះឆ្នោតក្លែងក្លាយ។ ហើយគាត់ជាអ្នកចាប់ផ្តើមសង្គ្រាម។

ការផ្លាស់ប្តូរជំហរដ៏គួរឱ្យភ្ញាក់ផ្អើលរបស់សហរដ្ឋអាមេរិកលើសង្គ្រាមនេះកាន់តែស៊ីជម្រៅថែមទៀតកាលពីថ្ងៃព្រហស្បតិ៍ នៅពេលដែលរដ្ឋបាល Trump បានជជែកជាមួយសមាជិក G7 អំពីសេចក្តីថ្លែងការណ៍រួមគ្នាក្នុងខួបលើកទីបីនៃការឈ្លានពាន ដោយអ្នកការទូតអាមេរិកប្រឆាំងនឹងការប្រើពាក្យ “ការឈ្លានពានរបស់រុស្ស៊ី” នៅក្នុងឯកសារនោះ។ មន្ត្រីបានប្រាប់ CNN ថា សមាជិក G7 ផ្សេងទៀតខ្លាចថានឹងផ្តល់ជ័យជម្នះមួយទៀតដល់រុស្ស៊ី បន្ទាប់ពីសហរដ្ឋអាមេរិកបានគាំទ្រលោក Putin លើការទាមទារមួយចំនួនរបស់គាត់អំពីសន្តិភាពនាពេលអនាគត មុនកិច្ចចរចានៅប្រទេសអារ៉ាប៊ីសាអូឌីតនាសប្តាហ៍នេះ។

ខណៈពេលដែលលោក Trump និយាយថា គាត់ជឿជាក់ថាលោក Putin ចង់បញ្ចប់សង្គ្រាម និងមានភាពម៉ឹងម៉ាត់ក្នុងការនិយាយអំពីសន្តិភាព ទីភ្នាក់ងារសើបការណ៍របស់សហរដ្ឋអាមេរិក និងសម្ព័ន្ធមិត្តមិនសូវមានការជឿជាក់ទេ។

ប្រភពបីដែលស្និទ្ធនឹងសេវាស៊ើបការណ៍លោកខាងលិចបានប្រាប់ Katie Bo Lillis និង Natasha Bertrand នៃ CNN ថា លោក Putin នៅតែមានគោលដៅបញ្ចូលអ៊ុយក្រែនទៅក្នុងរុស្ស៊ី ឬធានាឱ្យមានរដ្ឋតូចមួយដែលខ្សោយ និងពឹងផ្អែកលើទីក្រុងមូស្គូ។ “ប្រសិនបើអ្នកទទួលបានការឈប់បាញ់ នោះការឈប់បាញ់គ្រាន់តែជាពេលវេលាសម្រាប់លោក Putin សម្រាកនិងប្រដាប់អាវុធឡើងវិញ ហើយត្រឡប់មកវិញដើម្បីទទួលបានអ្វីដែលនៅសល់ដែលគាត់ចង់បាន” នេះជាសម្ដីរបស់ប្រភពមួយរូប។ “យើងមិនឃើញមានសញ្ញាណាមួយថាមហិច្ឆតារបស់គាត់បានផ្លាស់ប្តូរឡើយ។”

ព្រឹត្តិការណ៍ប៉ុន្មានថ្ងៃចុងក្រោយនេះ ដែលបានធ្វើឱ្យជនជាតិអ៊ុយក្រែនមានអារម្មណ៍ថាត្រូវបានក្បត់ សម្ព័ន្ធមិត្តសហរដ្ឋអាមេរិកព្រួយបារម្ភ និងសូម្បីតែសមាជិកព្រឹទ្ធសភាសាធារណរដ្ឋមួយចំនួនក៏មានការខឹងសម្បា បានធ្វើឱ្យមានការជជែកដេញដោលឡើងវិញអំពីគោលបំណងរបស់ប្រធានាធិបតី និងរបៀបដែលពួកគេនឹងជះឥទ្ធិពលដល់ឱកាសនៃកិច្ចព្រមព្រៀងសន្តិភាពដ៏យុត្តិធម៌មួយ។

តើប្រធានាធិបតីកំពុងត្រូវបានជំរុញដោយការស្អប់ផ្ទាល់ខ្លួនចំពោះលោក Zelensky មែនទេ? ឬក៏ជាការមើលងាយប្រទេសតូចមួយដែលត្រូវការជំនួយ ខណៈពេលដែលគាត់ព្យាយាមកែប្រែគោលនយោបាយការបរទេសរបស់សហរដ្ឋអាមេរិក ដើម្បីលើកកម្ពស់ប្រព័ន្ធវិសាលភាពឥទ្ធិពលដែលត្រូវបានគ្រប់គ្រងនៅក្នុងកិច្ចប្រជុំកំពូលមហាអំណាចដោយមេដឹកនាំខ្លាំងៗដូចជារូបគាត់ លោក Putin និងប្រធានាធិបតីចិន Xi Jinping? ឬក៏លោក Trump ដូចដែលគាត់ធ្លាប់ធ្វើពីមុន កំពុងជ្រើសរើសជំហរតឹងរឹងគ្រាន់តែដើម្បីបង្កើតលំហចរចាសម្រាប់ខ្លួនឯង? តើការទទួលយករបស់គាត់នូវចំណុចជាច្រើនដែលលោក Putin បាននិយាយ និងការសង្កត់ធ្ងន់លើលោក Zelensky ត្រូវបានរៀបចំឡើងដើម្បីទាក់ទាញប្រធានាធិបតីរុស្ស៊ីឱ្យមកតុចរចាសម្រាប់វគ្គចរចាដ៏តឹងតែងមួយមែនទេ? ពិតណាស់ ទំនាក់ទំនងល្អរបស់លោក Trump ជាមួយលោក Putin អាចធ្វើឱ្យគាត់ ច្រើនជាងមេដឹកនាំលោកខាងលិចណាផ្សេងទៀត មានឥទ្ធិពលលើការប្រព្រឹត្តរបស់រុស្ស៊ី និងអាចទាញយកការសម្របសម្រួល។

សន្តិភាពដែលស្ថិតស្ថេរ អនុញ្ញាតឱ្យអ៊ុយក្រែនបន្តរស់នៅជារដ្ឋឯករាជ្យ អធិបតេយ្យ ជៀសវាងការផ្តល់រង្វាន់ដល់ការពង្រីកទឹកដីរបស់លោក Putin និងសង្គ្រោះជីវិតរាប់លាននាក់ នឹងក្លាយជាសមិទ្ធផលកេរដំណែលដ៏ធំមួយសម្រាប់លោក Trump។ សង្គ្រាមពាក្យសម្ដីបច្ចុប្បន្នរវាងវ៉ាស៊ីនតោន និងគីវ មិនរារាំងការចរចាដ៏ម៉ឺងម៉ាត់នាពេលក្រោយទេ — ហើយនឹងត្រូវបានភ្លេចក្នុងពេលឆាប់ៗ ប្រសិនបើសន្តិភាពអាចត្រូវបានចរចា។ ទោះយ៉ាងណា លោក Trump មិនទាន់បង្ហាញភស្តុតាងថា គាត់កំពុងតែរៀបចំផែនការឆ្លាតវៃដើម្បីប្រឆាំងនឹងការបោកបញ្ឆោតរបស់គ្រឹមឡាំងនៅឡើយទេ។ ពាក្យសម្ដីឆាវៗរបស់លោក Trump តែងតែធ្វើឱ្យអ្នករិះគន់របស់គាត់ប្រតិកម្មហួសហេតុ ប៉ុន្តែពាក្យសម្ដីមានសារៈសំខាន់ក្នុងករណីនេះ — ដោយសារប្រធានាធិបតីកំពុងលាក់បាំងការពិតមូលដ្ឋានអំពីមូលហេតុដែលបង្កឱ្យមានសង្គ្រាម ដែលជាភាពខ្វះខាតមូលដ្ឋានមួយនៅក្នុងមេដឹកនាំម្នាក់ដែលកំពុងរៀបចំខ្លួនដើម្បីដឹកនាំការចរចាសន្តិភាពមួយនោះ៕

ប្រភព៖ CNN